Magkakasunod na dumating sa bansa ang labi ng tatlong Pinay na naipit sa mga gumuhong gusali sa Christchurch City bunsod ng malagim na lindol na naganap sa New Zealand noong nakaraang buwan.

Ayon sa Department of Foreign Affairs (DFA) unang dumating ang labi nina Jewel Francisco at Erica Nora na lulan ng Singapore Airlines noong Marso 18 habang sumunod kahapon ang labi ni Ivy Jane Cabunillas na iniuwi kasama ang kanilang mga nagdadalamhating mga mahal sa buhay.

Maagap namang sumalubong ang grupo mula sa DFA Office of the Undersecretary for Migrant Workers Affairs (DFA-OUMWA) at Overseas Workers Welfare Administration (OWWA) sa Ninoy Aquino International Airport at inasistehan sa kanilang mga panga­ngailangan.

Nasa paliparan din ang team mula sa Regional Consular Office ng Cebu para tulungan ang pamilya ng mga biktimang mula sa Cebu.

Nangako naman ang DFA-OUMWA at ang Philippine Embassy sa Wellington na patuloy ang gagawing pagtulong sa mga pamilyang natukoy na ng mga New Zealand Police at maging sa mga hindi pa nakikilala.