Sinamantala nina Reynaldo delos Reyes ng Philippine Army at Enate Sayrol ng Phil. Navy ang pagliban ng mga bigatin dahil na rin sa kamahalan ng bayad sa paglahok upang hablutin ang mga pangunahing karangalan sa kani-kanyang dibisyon sa Nike The Human Race 10-Kilometer paalis at pabalik sa McKinley Hill sa the Fort, Taguig City kahapon ng umaga.
Pinalamon ng alikabok ni Delos Reyes, tubong San Dionisio, Iloilo na nakadestino sa PA Second Infantry Division sa Tanay, Rizal at kampeon sa 2003 SPTUSA-Laguna Marathon, ang mga karibal sa buong yugto ng karipasan tungo sa pag-angkin sa titulo ng men’s division kaakibat ang oras na 37 minuto at 58 segundo.
Malayong lumagak na mga segunda at tersera sina Joar Calvadones (43:22) at Miguel Camacho (43:57) sa patakbong mga pinadrinuhan ng Rush Fitness Water, 1,107 Islands Cruise, FM 92.3, The Heritage Park, McKinley Hill Village, Hidden Spring, McDo­nald’s Video Sonic, R.O.X., Ala­xan, Fitness First, PEB Kons­truct, Inc., Photo­vendo, Men’s Health, One Spots at Print Avenue.
Inagaw naman ni Sayrol, 34, isinilang sa Rizal Palawan pero sa Taguig na rin residente kagaya ni Delos Reyes, ang trangka kay Genevieve dela Peña ng M2 Global Runners at kopoin ang korona sa women’s side sa tiyempong 47:12.
Nagtala si Dela Peña ng 50:13 clcoking para pumangalawa, habang pumangatlo si Jystel Leslie Co na mayroon namang 50:43 na time.
Kabilang sa mga pinaakyat din sa entablado upang abutin ang kanilang mga gantimpala mula kina Nike Philippines country manager Tony Atayde, director Coco Mauricio at race organizer Rio dela Cruz ang 10 mga nagwagi sa male and female age category na kinabibilangan ng mga sumusunod:
Jose Lorenzo Rivera ng University of the Philippines-Diliman (46:59) at Marie Navea Huff ng UP Track (1:01:53) sa category A; Robinson Angeles ng BSP Club (45:26) at Gabriela Calma ng Runners 4 Others (52:47) sa cate­gory B; Philip Le Roux (46:02) at Jaymie Pizarro ng Happy Feet (59:46) sa category C; Eduardo Martinez (51:14) at Miriam Cruz ng Executive Runners Club of the Philippines, Inc. (1:00:33) sa category D; at Peter Obligacion ng Philmug (58:42) at Patricia R. Halaguena (1:04:08) ng PAL sa category E.